رواية للشوق نار الفصل الخامس5 بقلم تقي محمد

كنا قاعدين عادي في البيت ومعانا خالتو سعاد كان سمعنا اصوات ضرب قويه فتحنا التلفزيون سمعنا الاخبار الضرب بين الدعم السريع والجيش وصل المطار كان في اصوات ضرب في الايام الفاتت ما كان في زول شغال بيهو لانو كان بعيد بس هسي بقى قريب امي قالت لينا الكلام دا زاد من الحد احسن نمرق من هنا قبل الضرب يصلنا خالتو سعاد قالت ليها انا بكره غايتو ماشه على ناس امي في الجزيره نحن ما كان عندنا زول قريب لينا او بنعرفوا في الولايات الامنه المهم قلنا نتريس حبه يمكن الحرب تهدأ خالتو سعاد وعمو خالد سافروا ودعناهم والدموع في عيونا لحظت فراغ ٢٥ سنه والله حاره شديد ياداب فقدت احمد سمح كان عندي صور من ايام الخطوبه دي الصور الوحيده الكانت بتزكرني بيهو...

بعد يومين الحرب هدت وبقينا ما بنسمع صوت ضرب حتى قلنا خلاص الموضوع دا معناها اتحلى لحدي ما بقينا نشوف المسيرات بي فوق راس بيتنا والصواريخ توقع في الحله وكل يوم نسمع صاروخ وقع في بيت زول نطلع نلقى جثث وناس ميتين منظر يقطع القلب لحدي ما وقعت في بيت ناس ابتهال!!

سمعنا الكواريك طلعنا لقينا بيت ناس ابتهال عباره عن كوم بتاع حجار بيتهم كان بناء مسلح والبيوت الجمبو حالتها ما احسن منو في دقائق ناس الاسعاف جو بس الحمد لله جات سليمه ماف وفيات غير راجل جيران ناس ابتهال دا لمن وقع الصاروخ كان في البيت ياخ منظر لاحولا نشوف اجزاء جسمو دي مقطعه لا حولا ولا قوة إلابالله

امي قالت لينا بس نطلع مشيت جمعت القروش حقت الكوفير والبوتيك وشلت لي مكوه وكم جهاز من الكوفير الدنيا ما معروفه يمكن نحتاج ليهم وبرضو شلت لي كم كريم وحاجات كدا من الكوفير وطلعت...

بقينا منتظرين الصباح يطلع متين 

اول ما الصبح ازن طلعنا لقينا لينا عربيه طالعه طلعنا معاهم نزلنا في الملتقى بقينا ما فاهمين اي حاجه

كان في معسكرات للجيش اطمنا حبه وبقينا ماشين لحدي ما لقينا دفار ماشي الشماليه طوالي ركبنا قريب تلاته يوم نحن في الشارع في النهايه الدفار نزلنا بقينا ماشين بي رجولنا لحدي ما وصلنا مدرسه نزلنا فيها كنا أُسر كتيره مع بعض كل زول قعد في فصل كنا منهكين دخلنا في فصل انا وأمي وندى اختي وقفلناهو علينا رقدنا في الارض..

صحيت الصباح جعانه قلت لي امي ماشه اشوف لو في دكان هنا اشتري منو حاجه ناكلها امي قالت لي سمح امشي

طلعت لاقتني بت قالت لي انتوا جيتوا امبارح؟ قلت ليها اي قالت لي تعالوا اشربوا الشاي قلت ليها ماشه الدكان اجيب حاجاتو ما عايزين نتقل عليكم قالت لي يابت ديل اصلا جايبنهم ناس الحي مساعده للنازحين

ماعارفه لكن كلمة نازحين دي وجعتني شديد كنا في بيوتنا امنين مطمئنين هسي نحن هنا بعيدين من بيوتنا وما عندنا شغل في يدينا وياهو القروش العندنا دي تنتهي ما معروف نعيش كيف إبتسمت ليها ومشيت ناديت ناس امي ما شاء الله ناس الحي ما كانو مقصرين مننا جابوا لينا الشاي والبسكويت مخبوز حتى ناس المحليه ما قصروا مننا جابوا لينا دقيق وسكر وحاجات كتيره بس معانات المدرسه وكونو انك ما قاعد في بيتك وحتى خصوصيه زي الناس ما عندك كانت صعبه لحدي ما فكرت انو نحن نطلع من المدرسه نمشي نأجر...